Sumáriu Dezeñu Investimentu pnds



Baixar 0.95 Mb.
Página1/2
Encontro03.07.2017
Tamanho0.95 Mb.
  1   2
Aneksu bá

Sumáriu Dezeñu Investimentu PNDS


Índise


Aneksu 1: PNDS nia Manuál Operasaun Programa 2

Aneksu 2: Austrália-nia Apoiu Interinu bá PNDS 3

Aneksu 3: Lisaun sira ne’ebé Aprende ona 5

Aneksu 4: CDD nia efikásia – Evidénsia Internasionál 13

Aneksu 5: PNDS nia Teoria kona-bá Mudansa 16

Aneksu 6: Ezbosu Indikativu kona-bá PNDS nia Sistema Monitorizasaun no Avaliasaun (M&E) 19

Aneksu 7: Estrutura Governasaun PNDS 24

Aneksu 8: PNDS nia Organograma 25

Aneksu 9: Ezbosu Oráriu Implementasaun nian 27

Aneksu 10: Matríz Risku 43




Aneksu 1: PNDS nia Manuál Operasaun Programa


Adisionál

Governu Timor-Leste-nia Manuál Operasaun Programa (MOP)1 mak dokumentu xave ne’ebé define konsesaun no implementasaun PNDS. Detalle sira kona-bá dezeñu no implementasaun PNDS tenke tuir Manuál Operasaun Programa. Dokumentu ida ne’e mak dokumentu komprensivu ne’ebé kobre asuntu oin-oin, inklui mós:

  1. Istória: kuadru regulatóriu; PNDS-nia objetivu no rezultadu-nia indikadór xave; jéneru no inkluzaun sosiál; prinsípiu orientasaun; kódigu konduta.

  2. Jestaun no Fundu Komunitáriu: alokasaun orsamentu nasionál; tipu atividade permitidu no mós la-permitidu; fatór ne’ebé provoka gastu iha suku nia orsamentu; jestaun bá suku-nia konta bankária; polítika no prosesu akizisaun; prosedimentu jestaun kaixa; aprezentasaun kona-bá relatóriu; atividade monitorizasaun no fiskalizasaun.

  3. Estrutura kona-bá Jestaun Programa no Autór sira: estrutura kona-bá programa-nia jestaun no knaar no responsabilidade husi autór nasionál, distritál, sub-distritál, no suku sira.

  4. Síkulu Programa: kapasitasaun; pasu sira iha síkulu programa; enjeñaria no asuntu tékniku sira.

  5. Kuadru bá Monitorizasaun no Avaliasaun: monitorizasaun komunidade no kontabilidade; monitorizasaun no fiskalizasaun Governu; relatóriu no sistema informasaun jestaun; kuadru avaliasaun; tratamentu bá reklamasaun.


Favór haree PNDS-nia Manuál ne’ebé aneksa ketak iha formatu PDF. Manuál ne’e mós bele asesu iha sítiu: http://aid.dfat.gov.au/Publications/Pages/pnds-operations-manual.aspx

Aneksu 2: Austrália-nia Apoiu Interinu bá PNDS


Iha tinan 2012 no 2013, Austrália fornese apoiu lojístiku no pesoál nasionál no internasionál hodi ajuda iha preparasaun polítika no lei kona-bá PNDS nian, dezenvolvimentu Manuál Operasaun Programa, estabelese Sekretariadu hodi tau-matan bá prosesu dezeñu no implementasaun programa no inklui sistema korporativu bá planeamentu no jestaun programa, treinamentu bá pesoál sira iha programa laran, dezenvolvimentu sistema monitorizasaun no avaliasaun, no mós halo esperimentasaun bá programa iha suku 30.

Austrália serbisu hamutuk ho Governu Timor-Leste iha nível bilaterál hodi fornese apoiu liu husi kontraktor ne’ebé maneja programa2 no mós fasilita parseiru dezenvolvimentu seluk sira-nia kontribuisaun iha PNDS. Totál valór husi Austrália nia apoiu bá tinan 2012-2013 no 2013-14 kuaze millaun 14.5 dolar amerikanu. Ami observa katak Governu Timor-Leste-nia planu no jestaun bá PNDS sei kontinua nafatin iha tinan 2013 no ida ne’e presiza fleksibilidade husi Austrália atu responde no adapta ita-nia apoiu. Austrália sei kontinua halo monitorizasaun no apoia Governu Timor-Leste-nia preparasaun iha tinan 2013, ho vizaun atu asegura katak ami iha konfidénsia bá iha programa-nia abilidade atu atinje ninia objetivu sira ho efetivu no efisiente. Bazea bá rekerimentu ida ne’e, molok tinan 2013 remata, Austrália antesipa katak nia sei atinje pontu sira tuir mai ne’e hodi suporta Governu Timor-Leste-nia PNDS.


Dezeñu: ajuda Governu Timor-Leste iha prosesu koordenasaun no dezenvolvimentu Manuál Operasaun Programa husi Grupu Tékniku. Manuál ne’e mak define prosedimentu operasaun no kontabilidade bá síkulu planeamentu komunidade, finansiamentu no implementasaun projetu. Iha fulan Abríl tinan 2013, Konsellu Ministru aprova Dekretu Lei ida ne’ebé kobre Manuál-nia operasaun no mós knaar no responsabilidade husi ema sira ne’ebé envolve iha PNDS, no Manuál ne’e sei hein hela promulgasaun husi Prezidente atu permite programa-nia implementasaun. Manuál ne’e sei hetan revizaun iha tinan 2013 nia ikus bazea bá lisaun ne’ebé aprende ona husi esperimentasaun kampu nian iha suku 30 durante tinan-klaran. Ekipa Serbisu Tékniku sei kontinua fornese investimentu liña-ministériu regulár bá iha dezenvolvimentu PNDS no halo desizaun kona-bá kestaun xave operasionál no dezeñu nian. Austrália-nia apoiu iha serbivu ida ne’e mak hanesan kolokasaun pesoál espesialista (AusAID no pesoál kontratadu) iha PNDS-nia Sekretariadu no mós kompromisu bilaterál ne’ebé sustentável iha nível aas no nível ofisiál.
Jestaun: Apoia Governu Timor-Leste atu dezenvolve planu korporativu no sistema luan ne’ebé nesesáriu hodi sustenta PNDS. Apoiu ida ne’e inklui hametin jestaun rekursu umanu iha MAE, rekruta mós pesoál adisionál bá MAE hodi hala’o PNDS, no ho Komisaun Funsaun Públika (KFP), dezenvolve no kria estratéjia rekrutamentu ida bá fasilitadór treinadu 350 ne’ebé sei rekruta hanesan funsionáriu públiku. Apoiu ne’e mós inklui dezenvolve sistema gastu finanséiru transparente ida hamutuk ho Ministériu Finansa. Sei dezeña mós mekanizmu ida hodi atende reklamasaun. Maneira atu ezekuta programa mak hanesan halo interasaun polítika ho MAE, Ministériu Finansa no KSS ho kooperasaun husi Austrália-nia Programa Governasaun bá Dezenvolvimentu no kolokasaun pesoál espesialista sira.
Treinamentu: realiza programa treinamentu oin tolu (fasilitasaun sosiál, jestaun finanséiru no dezeñu tékniku, bazea bá programa-nia pasu ne’ebé define iha Manuál) bá kuaze ema atus haat, feto no mane. Komisaun Funsaun Públika (KFP) sei rekruta kuaze ema 350 nu’udar fasilitadór sosiál, tékniku no finanséiru iha nível distritu no sub-distritu atu servisu hamutuk ho komunidade sira. Ofisiál MAE mós sei hetan treinamentu kona-bá oinsá uza PNDS-nia Sistema Informasaun Jestaun. Austrália-nia espesialista mak sei dezenvolve no organiza treinamentu ida ne’e, no sira sei serbisu hamutuk ho entidade lokál sira no Ministériu Finansa. Dadaun ne’e iha ona esforsu no serbisu atu halo programa ne’e sai akreditadu iha futuru tuir kuadru akreditasaun nasionál bá treinamentu.
Monitorizasaun no Avaliasaun: apoia Governu Timor-Leste atu dezenvolve sistema monitorizasaun no avaliasaun bá PNDS, inklui Sistema Informasaun kona-bá Jestaun (SIJ). Halo serbisu inisiál hodi tau-matan bá esperimentasaun kampu, estabelese dadus inisiál bá programa ne’e no komprende kestaun xave sira ne’ebé relasiona ho komunidade-nia partisipasaun. Servisu ida ne’e karik sei inklui Fundasaun Ázia, Banku Mundiál, no ONG lokál hodi sai hanesan parseiru no mós uza pesoál hodi koloka iha Sekretariadu.
Implementa esperimentasaun-kampu: ajuda Governu Timor-Leste atu hala’o esperimentasaun iha kampu bá prosesu PNDS iha suku 30 liu hosi apoiu dezeñu, fó treinamentu bá grupu ki’ik ne’ebé sei fasilita esperimentasaun-kampu kona-bá Programa-nia Manuál, no tau-matan bá prosesu no ninia rezultadu. Maneira ezekusaun mak hanesan halo treinamentu, rona ideia husi espesialista sira ne’ebé koloka iha PNDS-nia Sekretariadu no halo interasaun ho parseiru sosiedade sivíl sira hodi monitoriza rezultadu sosiál no tékniku, no mós kompromisu bilaterál hodi konsidera revizaun bá PNDS-nia Manuál bazea bá rezultadu husi esperimentasaun-kampu.
Atu hatene di’ak liu tan detalla kona-bá Austrália-nia apoiu atuál bá PNDS, bele haree iha Ezbosu Oráriu Implementasaun Nian iha Aneksu 7.

Aneksu 3: Lisaun sira ne’ebé Aprende ona


Durante prosesu preparasaun bá Dezeñu Investimentu ida ne’e, Austrália hala’o estudu literatura ida kona-bá Dezenvolvimentu Bazea bá Komunidade (DBK) no Dezenvolvimentu Xefia husi Komunidade (CDD) ne’ebé eziste iha Timor-Leste iha pasadu. Tuirmai ne’e mak lisaun sira ne’ebé aprende husi estudu ida ne’e.

Partisipasaun no Inkluzaun


Lisaun husi pasadu hatudu katak komunidade-nia partisipasaun másimu mak pre-kondisaun xave ida atu bele realiza dezenvolvimentu bazea bá komunidade no dezenvolvimentu xefia hosi komunidade iha Timor-Leste. Evidénsia iha lisaun ne’e hatudu katak komunidade-nia partisipasaun mak xave atu asegura katak projetu sira responde duni bá komunidade-nia nesesidade atuál, no projetu sira ne’e asesivel, utiliza, no hetan duni manutensaun.
Feto sira-nia partisipasaun iha programa dezenvolvimentu bazea bá komunidade no dezenvolvimentu xefia husi komunidade iha Timor-Leste lahanesan. Mezmu feto sira iha partisipasaun maka’as iha enkontru komunitáriu nian, evidénsia hatudu katak mane sira mak halo desizaun barak, liuliu mane sira ne’ebé serve hanesan xefe-suku ka lia-na’in. Tuir Fundasaun Ázia (2012), iha suku balu, mezmu feto sira atende enkontru, ema ignora tiha de’it feto sira-nia kontribuisaun, hanesan partisipante ida haktuir: “sira (feto) iha lian ne’ebé maka’as, maibé ida ne’e hanesan de’it tanbá ema la fó-atensaun bá sira (feto)”3 Programa Dezenvolvimentu Lokál (PDL) identifika ona razaun lubuk ida tanbá sá feto-nia partisipasaun uitoan, inklui tanbá sá laiha subsídiu hodi kobre sira-nia transporte, sira-nia tempu ne’ebé lakon bainhira sai husi uma, no mós falta kompensasaun bá sira-nia partisipasaun iha enkontru.
Iha Programa Hakbiit Komunidade (PHK), komunidade-nia partisipasaun iha programa ne’e iha nível oioin, depende bá fasilitadór-nia abilidade, xefe-suku-nia podér no projetu-nia natureza4. Mezmu iha fatin balu iha partisipasaun ne’ebé maka’as, komunidade-nia opsaun bá projetu limitadu de’it bá iha infrastrutura bazea bá merkadu (market-based infrastructure) – maske iha prioridade balu mak identifika ona durante prosesu konsultasaun ho komunidade. Entaun ida ne’e halo-fraku relevánsia no pose lokál bá infrastrutura sira ne’ebé harii liu hosi programa ne’e.
Iha Programa Dezenvolvimentu Desentralizadu (PDD), komunidade sira iha partisipasaun mínimu iha prosesu identifikasaun projetu PDD ne’ebé prepara hosi liña Ministériu sira, no laiha prosesu lokál bá prioritizasaun, konsultasaun, no planeamentu, ne’ebé nesesáriu bá faze seluk implementasaun projetu nian. Fundasaun Ázia-nia estudu kona-bá komunidade-nia esperiénsia iha dezenvolvimentu desentralizadu5 iha Timor-Leste hatudu katak PDD ne’e regulármente refere hanesan programa ne’ebé refleta interese nasionál grupu elite, no programa ne’e vulneravel liu bá “interese polítika husi leten”6 – no ida ne’e afeta uzu no sustentabilidade hosi infrastrutura sira ne’ebé harii iha programa PDD-nia laran.
PDL fó énfaze maka’as bá iha komunidade-nia partisipasaun iha prosesu identifikasaun projetu no prosesu priorizasaun bá projetu-nia proposta. Iha estudu ne’ebé mensiona iha leten, Fundasaun Ázia deskobre katak kuaze partisipante hotu-hotu iha estudu ne’e deklara sira-nia preferénsia bá prosesu PDL duké PDD7, no sira deskreve projetu ne’e hanesan ‘hosi kraik-bá-leten’, la’ós ‘hosi leten-bá-kraik8.
Tuir Fundasaun Ázia, prosesu planeamentu bá Planu Dezenvolvimentu Suku (PDS)9 sai fraku tanbá hetan partisipasaun mínimu iha nível aldeia. Komunidade-nia partisipasaun iha nível ida ne’e difisil atu hetan tanbá aproximasaun partisipatória ne’ebé fraku, komunidade fó tempu bá fali prioridade seluk, no de faktu, iha kazu balu, sira ne’ebé iha relasaun di’ak ho xefe-suku de’it mak iha kbiit atu partisipa10. Tanbá ne’e, rezultadu hosi PDS la-refleta komunidade tomak-nia nesesidade bá dezenvolvimentu.
Austrália-nia experiénsia iha projetu BESIK hatudu katak ho tempu no esforsu ne’ebé iha alvu loos, iha posibilidade atu hadi’a feto sira-nia partisipasaun iha komunidade atu halo desizaun no utiliza rekursu. Porezemplu, hosi grupu utilizadór bee ne’ebé estabelese hosi BESIK, porsentu 72 hosi grupu no lider komunitáriu ne’e hatete katak feto no mane halo desizaun hamutuk, kontráriu ho porsentu 37 ne’ebé eziste antes projetu ne’e hahú. 11 Maske nune’e, AusAID-nia estudu sektorál (2009) halo konkluzaun katak atitude tradisionál jéneru nian kontinua domina no impede oportunidade bá feto sira atu partisipa iha prosesu estabelesimentu knaar lideransa nian.‖
Tuir Banku Mundiál-nia revizaun kona-bá projetu infrastrutura bazea bá komunidade iha Timor-Leste, métodu di’ak atu bele haforsa feto-nia partisipasaun mak hanesan fó treinamentu bá fasilitadór feto sira, konvoka enkontru ketak ho feto sira, fó kota bá númeru feto iha projetu atu bele ezekuta projetu, no hala’o enkontru iha tempu ida ne’ebé feto barak bele atende12. Esperiénsia internasionál mós hatudu katak fasilitadór ne’ebé iha funsionamentu-aas bele sai fatór determinante ne’ebé asegura projetu-nia susesu iha nível distritu, halo komunidade aseita programa ne’e, no promove partisipasaun ativu. Fasilitadór sira ne’ebé treinadu ho di’ak iha abilidade atu halo interasaun ho feto no grupu ki’ik sira iha prosesu partisipatória, no enkoraja feto sira atu ko’alia no influensia planeamentu projetu.13
Lisaun: Fasilitadór nível sub-distritu sira ne’ebé iha motivasaun maka’as, sira-nia servisu mak sei esensiál bá programa-nia susesu. Presiza tebes apoiu bá komunidade-nia partisipasaun ne’ebé adekuadu iha sesaun planeamentu liu hosi fornesimentu orientasaun ne’ebé klaru bá komunidade hodi fasilita sira iha planeamentu partisipatória no/ka fornesimentu apoiu esternu balu, no rekoñese tempu, esforsu no atensaun ne’ebé presiza hodi realiza planeamentu partisipatória iha komunidade.

  • Austrália sei suporta esforsu sira ne’ebé sei asegura katak partisipasaun di’ak mak sei sai objetivu esplísitu hosi PNDS-nia serbisu no sei tau-matan bá ida ne’e.

  • Hanesan deskreve nanis ona iha PNDS-nia Sumáriu Dezeñu Investimentu, katak Austrália-nia investimentu lubuk ida sei dirije bá treinamentu no apoiu (ho kontinuasaun) bá fasilitadór sira.



Prosesu halo priorizasaun bá projetu


Esperiénsia hatudu katak komunidade-nia prioritizasaun kona-bá prioridade no projetu sira mak sai hanesan frakeza boot iha programa dezenvolvimentu bazea bá komunidade no dezenvolvimentu xefia hosi komunidade iha Timor-Leste14. Fundasaun Ázia (2012) haktuir katak, iha PDL no PDD, ema la-vota bazea bá proposta-nia méritu, maibé sira deside bazea de’it bá ema ne’ebé ko’alia di’ak no lobidór sira, ka sira la-deside bazea bá komunidade-nia interese, maibé bazea de’it bá interese pesoál ka polítika. Fundasaun Ázia-nia estudu ne’e deskobre katak ida ne’e fó impaktu diretamente bá relevánsia no uzu hosi infrastrutura sira ne’ebé harii iha programa ne’e15.
Tuir Relatóriu Funsionamentu Avaliasaun Projetu hosi Banku Mundiál-nia CEP hatudu katak komunidade-nia abilidade atu identifika sira-nia nesesidade bá dezenvolvimentu no halo desizaun, sofre limitasaun tanbá laiha atensaun ne’ebé adekuadu bá komunidade sira-nia kapasidade.
Lisaun 1: Tenke tau medida espesífiku sira hodi enkoraja priorizasaun projetu bazea bá proposta-nia méritu no uzu.

  • PNDS estabelese ona kritéria sasukat, no liu hosi sasukat ne’e membru konsellu sira bele avalia proposta oioin, atu nune’e bele ajuda partisipante sira hodi halo desizaun bazea bá evidénsia.


Lisaun 2: Komunidade-nia kapasidade atu prioriza projetu bazea bá dezenvolvimentu-nia nesesidade no méritu tenke estabelese no monitoriza ho di’ak.

  • PNDS prioriza treinamentu bá fasilitadór sira hodi hakbiit sira atu apoia komunidade sira hodi halo desizaun bazea bá evidénsia. Partikulármente, fasilitador tékniku no finanséiru sei suporta komunidade sira hodi identifika kada proposta ida-nia konstrusaun tékniku no kustu atu nune’e sira bele halo desizaun ne’ebé informadu. PNDS-nia ekipa kampu mak sei sai hanesan instrumentu xave bá monitorizasaun iha prosesu priorizasaun projetu ne’e.


Infrastrutura-nia efikásia no sustentabilidade


Literatura sira ne’ebé uza bá ezersísiu ne’e énfaze katak presiza komunidade-nia partisipasaun atu nune’e bele asegura infrastrutura ne’ebé relevante, efetivu no sustentável. Atu asegura infrastrutura ne’ebé efetivu, importante atu labele iha fatór sosiál ka ambientál lokál ne’ebé bele fó impaktu bá infrastrutura-nia finalizasaun ka sustentabilidade, porezemplu fatór sira hanesan konflitu kona-bá rai ka impaktu hosi klima lokál.

Tuir Relatóriu Funsionamentu Avaliasaun Projetu hosi Banku Mundiál-nia CEP hatudu katak, infrastrutura-nia sustentabilidade no adekuasaun iha CEP hetan afeta tanbá komunidade sira dala barak la-haree CEP hanesan investimentu ida atu maneja no hadi’a dezenvolvimentu iha Timor-Leste, maibé komunidade sira haree CEP hanesan fali fonte bá apoiu no rendimentu. Entaun dala barak ida ne’e rezulta ho infrastrutura sira ne’ebé la-kumpre komunidade-nia nesesidade16. Maske nune’e, problema boot ida mak konsellu suku sira la-hamriik iha pozisaun ne’ebé forte atu komete bá tipu infrastrutura sira ne’ebé iha prioridade aas tanbá laiha polítika no estrutura hosi nível nasionál ne’ebé nesesáriu atu permite dezenvolvimentu bá infrastrutura sira iha área saúde no edukasaun.


Fundasaun Ázia (2012) haktuir katak falta partisipasaun hosi membru komunidade no grupu benefisiáriu sira iha PDD no PDL fó impaktu signifikante bá projetu sira, até projetu sira ne’e sai inapropriadu no la-sustentável17. Partisipante ida iha estudu ne’e hatete:

projetu ida-ne’e, planeamentu no dezeñu hotu-hotu mai hosi nasionál. Maibé bainhira sira remata ona projetu ne’e, komunidade lakohi uza tanbá infrastrutura ne’e la-relevante bá sira-nia nesesidade18.


Tuir Fundasaun Ázia-nia estudu iha leten ne’e, partisipante barak mak identifika kestaun kona-bá infrastrutura-nia manutensaun nu’udar frakeza xave iha projetu PDD no PDL. Frakeza sira ne’e inklui: expetativa ne’ebé la-realístiku bá komunidade-nia kapasidade ekonómiku atu halo manutensaun; laiha konkordánsia entre membru komunidade kona-bá sé mak iha responsabilidade atu halo manutensaun; komunidade laiha sentidu na’in bá infrastrutura; akordu kona-bá manutensaun la-hatudu kompriensaun kona-bá komunidade-nia moris – no asume de’it katak komunidade bele sai boot kuandu sira halo manutensaun bá infrastrutura19.
Iha Austrália-nia esperiénsia iha projetu BESIK, prosesu konsultasaun ho komunidade ne’ebé xefia husi Governu iha BESIK-nia prosesu Planeamentu Asaun Komunidade mak ajuda promove komunidade-nia partisipasaun, inkluzaun no sentidu na’in bá projetu sira. Prosesu ne’e xefia hosi fasilitadór nível sub-distritu ne’ebé treinadu hosi BESIK, no prosesu ne’e hetan kredibilidade tanbá komunidade-nia konfiansa iha fasilitadór sira ne’ebé hala’o servisu nu’udar ofisiál governu permanente.20
Lisaun 1: provávelmente komunidade sira sei uza no mantein infrastrutura báziku iha suku kuandu infrastrutura sira ne’e harii liu hosi prosesu partisipatória iha komunidade laran.

  • PNDS-nia Manual Operasaun Programa estabelese mekanizmu lubuk ida atu suporta komunidade-nia partisipasaun másimu iha prosesu halo desizaun.

  • Durante PNDS-nia tinan haat iha inísiu, Austrália sei subsidia kustu adisionál sira ne’ebé nesesáriu hodi asegura programa-nia kualidade. Ami-nia fundus hatudu ami-nia kompromisu nu’udar Governu Timor-Leste-nia parseiru.


Lisaun 2: Kasukat/padraun tékniku ne’ebé apropriadu mak ajuda komunidade hodi mantein infrastrutura sira iha nível suku.21

  • PNDS-nia Manual Operasaun Programa estabelese padraun tékniku hodi ajuda komunidade atu harii no mantein infrastrutura. Fasilitadór tékniku sei hetan treinamentu hodi ajuda komunidade atu komprende kona-bá rekizitu funsionamentu no manutensaun nian.



Lideransa no kompriensaun kona-bá kontextu lokál


Tuir Banku Mundiál (2012), fatór importante liu ne’ebé determina projetu dezenvolvimentu no konsellu komunidade-nia susesu mak lider konsellu-nia abilidade iha lideransa. Iha fatin sira ne’ebé lider komunitáriu konsege motiva membru komunidade sira atu servisu hamutuk, fatin sira ne’e hatudu nível partisipasaun aas hosi komunidade. Konsellu Suku presiza treinamentu no apoiu barak durante tempu barak nia laran hodi dezenvolve kapasidade ne’ebé sei hakbiit sira atu fasilita no maneja dezenvolvimentu iha nível suku. Sistema kota bá feto-nia reprezentativu mós efetivu, maske sei presiza treinamentu no apoiu hodi hakat liu atitude tradisionál sira no mantein nafatin nível partisipasaun feto nian.
Iha kazu CEP nian, revee lubuk ida konkorda katak nosaun tradisionál kona-bá lideransa no autoridade hetan kredibilidade ne’ebé uitoan liu iha prosesu halo desizaun iha nível suku25. Xefe-suku no rede rezisténsia sira eskluzivamente la inklui iha konsellu CEP nu’udar tentativa ida atu hamihis posibilidade bá elite sira-nia ukun. Maske nune’e, Banku Mundiál-nia avaliasaun kona-bá CEP hatudu katak desizaun ne’ebé esklui katuas sira hosi projetu ne’e desizaun ne’ebé la-kalkula ho di’ak22. Relatóriu ne’e hatete katak autoridade pre-eziste iha legalidade lokál maibé konsellu CEP nunka hetan legalidade ida ne’e tanba ne’e konsellu-nia knaar la-efetivu. Satán, pesoál distritu sira laiha rekursu ne’ebé sufisiente no sira-nia podér atu halo desizaun la-forte.
Aleinde, iha mós rekizitu ida ne’ebé dehan katak membru konsellu suku sira tenke hatene hakerek no lee, no ida ne’e taka-dalan bá autoridade tradisionál barak, liuliu bá feto sira. Estudu antropolójiku CEP nian23 hatudu katak membru konsellu CEP sira laiha autoridade tanbá ema haree bá sira-nia idade ne’ebé ki’ik – idade mós serve hanesan fatór ida ne’ebé determina autoridade iha komunidade laran. Banku Mundiál (2012) haktuir katak CEP komprende sala kontextu kulturál ne’ebé iha – tanbá iha kontextu kulturál ne’e, podér atu halo desizaun no tesi lia investe iha lider tradisionál sira. Membru konsellu la-simu pagamentu durante CEP, kontra sira-nia expetativa, no ida ne’e taka-dalan liu tan bá governasaun efetivu.
PDL rekoñese katak xefe-suku sira, nu’udar ponte entre komunidade no estadu, iha presaun barak liu, tanbá ne’e sira bele hetan benefísiu kuandu iha treinamentu ruma. PDL konsege hametin konsellu suku-nia knaar nu’udar fasilitadór dezenvolvimentu, no ajuda membru konsellu suku sira, administradór distritu sira, no pesoál tékniku sira hodi dezenvolve abilidade kona-bá advokasía, lobi, negosiasaun no fasilitasaun.
Lisaun: lideransa programa ne’ebé halo-tuir kontextu kulturál no estrutura komunidade tradisionál aumenta komunidade-nia partisipasaun no sentidu na’in.

  • PNDS-nia estrutura operasionál define knaar no responsabilidade iha nível komunidade atu uza modelu lideransa Konsellu Suku nian24, ho mekanizmu adisionál bá komunidade-nia partisipasaun másimu atu nune’e bele suporta supervizaun, partisipasaun inklusivu no oportunidade bá enkapasitasaun.



Provizaun bá Kréditu


Tuir Banku Mundiál-nia revizaun, CEP-nia komponente kréditu laiha liu susesu. Banku Mundiál-nia revizaun kona-bá CEP hatudu katak iha krítiku lubuk ida mak fó sira-nia konsellu kontra utilizasaun komponente mikro-kréditu bazea bá esperiénsia pasadu. Falta instituisaun mikro-finansa iha momentu ne’ebá atu suporta komponente kréditu mós kontribui bá programa-nia fallansu. Falta transparénsia kona-bá distribuisaun kréditu ikus mai fó dalan bá elite sira de’it mak hetan benefísiu.

  • PNDS la-inklui komponente kréditu.



Supervizaun bá jestaun no kontabilidade


Ezersísiu iha Lisaun ne’ebé aprende ona deskobre katak falta iha mekanizmu kontabilidade nian – porezemplu hanesan monitorizasaun finanséiru komunidade nian ka mekanizmu atu atende reklamasaun, ida ne’e bele halo fraku komunidade-nia sentidu na’in ne’ebé importante bá CDD ka DBK-nia aproximasaun. Ezersísiu ne’e deskobre katak mekanizmu atu atende reklamasaun tenke klaru no inklui liña komunikasaun bá ema kesar na’in kona-bá asaun ne’ebé rezulta hosi sira-nia reklamasaun. Konsellu ne’ebé eleitu demokratikamente presiza halo interasaun ho lider tradisionál sira hodi suporta dezenvolvimentu lokál.

Banku Mundiál-nia Relatóriu Funsionamentu Avaliasaun Projetu CEP hatudu katak komunidade la komprende di’ak regra akizisaun no jerálmente laiha konformidade bá transparénsia no fiar. Banku Mundiál determina katak difisil tebes atu halo monitorizasaun bá jestaun finanséiru iha nível komunidade.

Fundasaun Ázia (2012) mós haktuir katak iha projetu PDL no PDD, sira hetan frakeza iha kuadru monitorizasaun no mekanizmu atu atende reklamasaun25.

Lisaun: Mekanizmu kontabilidade ne’e nesesáriu tebetebes: fasilita liña informasaun bá komunidade sira; no promove kontabilidade sosiál, inklui liu hosi mekanizmu keixa nian no Monitorizasaun no Avaliasaun (M&E) bazea bá komunidade.

Sistema Atendimentu Reklamasaun ida ne’ebé efetivu importante tebes atu kria konfiansa no hametin governasaun. Sistema ne’e nia efisiénsia depende mós bá PNDS-nia autór oioin, liuliu autór sira-nia kompriensaun kona-bá direitu no responsabilidade, no kompriensaun ne’ebé klaru kona-bá prosesu.



  • Austrália apoia Ministériu Administrasaun Estatál atu dezeña no maneja PNDS-nia mekanizmu ne’ebé atende reklamasaun nu’udar fatuk-riin xave bá kontabilidade no sustentabilidade. Mekanizmu ne’e sei funsiona iha nível nasionál, distritál no sub-distritál, no sei envolve mós mekanizmu sira ne’ebé sei uza bá hodi hadi’a komunikasaun no rezolve konflitu.



mak implementa projetu sira


Fundasaun Ázia (2012) deskobre katak iha nível suku, komunidade iha preferénsia ne’ebé maka’as atu hala’o servisu, tanbá iha hanoin katak sira iha insentivu di’ak liu atu asegura servisu-nia kualidade ho rezultadu ne’ebé sustentável. Maske nune’e, ofisiál distritál sira mensiona difikuldade boot ne’ebé sira enfrenta durante halo monitorizasaun no implementa sansaun bá grupu komunidade sira: maske fasil atu halo lista-metan bá kompaña sira ne’ebé la-halo servisu ho kualidade di’ak, difisil tebes fó sansaun bá grupu komunidade sira ne’ebé hala’o projetu la-tuir padraun di’ak26.

Lisaun 1: Bainhira membru komunidade envolve iha prosesu implementasaun projetu, monitorizasaun no avaliasaun kria sentidu na’in no aumenta projetu-nia sustentabilidade.

  • PNDS sei sai hanesan projetu dezenvolvimentu ne’ebé xefia hosi komunidade, no komunidade mak sei xefia estájiu hotu-hotu iha projetu laran.

PNDS-nia fasilitadór sira sei ajuda komunidade hodi konsidera kestaun implementasaun tékniku durante prosesu priorizasaun projetu.

Lisaun 2: Presiza monitorizasaun ne’ebé apropriadu atu garante katak projetu implementa duni ho efetivu.

  • Ekipa Apoia Kampu sei la’o no pasa sira-nia tempu kuaze porsentu 75 iha baze. Hanesan mensiona iha Seksaun 4, Saida mak Austrália sei fundu (p39) katak programa CDD-nia susesu depende loos bá fasilitadór sira ne’ebé iha abilidade di’ak no efetivu atu suporta partisipasaun, planeamentu, halo-desizaun no implementasaun.

  • Ekipa Apoia Kampu sei hala’o viajen estensiva bá iha kampu no hato’o relatóriu bá ekipa jestaun kona-bá sira-nia observasaun – kestaun negativu no pozitivu. Ida ne’e mak sei permite ekipa jestaun hodi halo desizaun no responde bá kestaun sira ne’ebé sei mosu. Ekipa kampu mak sei verifika dadus iha relatóriu, dokumentasaun bá programa-nia susesu, identifika problema prinsipál sira, no liga komunikasaun ne’ebé mai hosi lokál, permite ema lokál-nia opiniaun bá iha programa laran no rezolve problema sira. Sira mak sei hala’o prosesu verifikasaun esternu hodi hamihis risku sira hanesan fraude, problema ambientál, no dominasaun hosi elite sira.


Monitorizasaun no Avaliasaun


Presiza iha sistema monitorizasaun no avaliasaun ne’ebé forte iha nível Governu no apoiu programa tanbá ida ne’e importante atu permite programa CDD hodi aprende, adapta bá iha kontestu lokál no halo mudansa iha tempu naruk. Sira mós importante bainhira governu-nia monitorizasaun no avaliasaun bá servisu sira la-la’o ho di’ak, no programa CDD sei halo projetu pilotu bá sistema foun atu nune’e bele fó informasaun ne’ebé di’ak liu tan bá iha prosesu planeamentu, ezekusaun polítika governu nian.

Banku Mundiál-nia Relatóriu Funsionamentu Avaliasaun Projetu CEP hatudu katak monitorizasaun ne’ebé iha, limitadu de’it bá projetu-nia input no output. Rezultadu monitorizasaun ne’e la-konsege halo relatóriu kona-bá projetu-nia objetivu jerál. Mezmu iha monitorizasaun input no output nian mós iha frakeza ne’ebé signifikante. Relatóriu kona-bá projetu-nia finalizasaun hatudu katak indikadór báziku balu ne’ebé projetu identifika la-konsege hetan monitorizasaun, porezemplu hanesan númeru membru komité ne’ebé estabelese iha projetu laran.


Lisaun: Presiza iha sistema di’ak ida atu bele hatene tuir projetu-nia input no output, no projetu-nia rezultadu, no mós fornese informasaun kona-bá adaptasaun ne’ebé nesesáriu iha prosesu dezeñu projetu atu garante katak projetu-nia objetivu no atividade sira relevante duni ho kontextu institusionál ne’ebé iha no mós nasaun-nia kapasidade atu absorve.

  • Manuál Operasaun Programa fornese mekanizmu ida bá avaliasaun atividade anuál no kontabilidade;

  • Sistema Informasaun kona-bá Jestaun ne’ebé Austrália ajuda atu dezeña sei kria baze ida atu halo jestaun di’ak bá risku sira, fornese evidénsia di’ak bá avaliasaun impaktu no garante istória ne’ebé di’ak.

  • Planu bá monitorizasaun no avaliasaun ne’ebé Austrália ajuda atu dezeña sei inklui estudu baze no avaliasaun ho interval ne’ebé regulár.


Aneksu 4: CDD nia efikásia – Evidénsia Internasionál


Evidénsia internasionál hatudu katak programa CDD efetivu iha aumenta benefísiu sosiál no ekonómiku. Ezemplu hatudu ona katak CDD bele fó rezultadu di’ak ho lalais iha fatin sira ne’ebé governu no doadór sira laiha rekursu barak atu to’o diretamente iha ema mukit sira, liuliu iha nasaun sira ne’ebé sofre konflitu. Ami nota katak CDD-nia aproximasaun tenta atu alkansa dezenvolvimentu-nia objetivu boot hanesan kapitál sosiál, koezaun no empoderamentu. Ami nota katak esperiénsia internasionál hatudu de’it evidénsia ne’ebé uitoan kona-bá programa CDD-nia kontribuisaun bá iha objetivu jerál dezenvolvimentu nian, ka sukat no atribui rezultadu ne’e bá iha programa. Importante atu iha expetativa ne’ebé realístiku kona-bá PNDS-nia abilidade atu realiza objetivu dezenvolvimentu nian ne’ebé bele sukat uitoan de’it.

Iha nível internasionál, ezemplu hatudu katak programa CDD hadi’a duni ema-nia padraun moris iha fatin sira ne’ebé ninia instituisaun lokál (governu ka merkadu) ladún iha funsionamentu di’ak atu fornese servisu bá komunidade. Foin lalais, Banku Mundiál-nia meta-avaliasaun kona-bá programa CDD iha nasaun barak hatudu evidénsia pozitivu iha programa-nia laran katak programa ne’e hasa’e duni ema-nia padraun moris no benefísiu, identifika pobreza, no aumenta asesu bá servisu sira.27 Avaliasaun ne’e deskobre katak evidénsia barak mak hatudu programa CDD-nia impaktu pozitivu bá iha asesu servisu nian, liuliu iha área saúde, edukasaun no bee-hemu. Porezemplu, sub-projetu ida ne’ebé halo parte iha Senegal-nia Programa Nasionál Infrastrutura Rurál (PNIR) “aumenta duni ema-nia asesu bá bee-moos no fasilidade saúde, no hadi’a labarik sira-nia alimentasaun....Satán, projetu ne’e mós fó impaktu di’ak iha área sira ne’ebé seidauk kompleta sira-nia projetu; até ema balu horik de’it iha área ne’ebé lejivel bá projetu PNIR no sira mós hetan benefísiu (relasiona ho labarik-nia saúde), karik tanbá efeitu pozitivu ne’ebé sulin hosi suku viziñu sira ne’ebé kompleta ona sira-nia projetu.”28 Programa KALAHI-CIDSS iha Filipinas mós iha fó impaktu pozitivu bá uma-kain barak hodi aumenta porsentu 6 iha proporsaun uma-kain sira ne’ebé hetan asesu hosi estrada iha tinan tomak.29

Avaliasaun impaktu ne’ebé Latif Jameel Poverty Action Lab halo iha Sierra Leone30 indika katak suku sira ne’ebé partisipa iha CDD-nia programa hetan ona servisu públiku ne’ebé di’ak liu kompara ho suku sira seluk, no sira mós iha atividade merkadu adisionál, benefísiu ekonómiku, no ladún iha efeitu negativu hosi projetu-nia rekursu.



CDD relevante liu iha nasaun sira ne’ebé vulneravel no sofre hosi konflitu. Iha Afeganistaun, Projetu Solidariedade Nasionál (PSN) hahú iha 2003 hanesan esforsu ida atu lolo-liman bá komunidade rurál sira ne’ebé sofre problema rebelde no produsaun opium. Dezde projetu ne’e hahú, ema estabelese ona konsellu dezenvolvimentu komunidade kuaze 21,000, no konsege tama to’o porsentu 70 hosi total suku iha Afeganistaun, no hadi’a infrastrutura eskala ki’ik inklui sistema bee-moos no estrada. PS aumenta ona governu-nia vizibilidade no lejitimasaun iha komunidade laran, no ida ne’e mak importante liu iha fatin vulneravel sira 31.

CDD adopta aproximasaun valor-ba-osan di’ak hodi harii no mantein infrastrutura. Estudu kona-bá Banku Mundiál-nia programa barak hatudu katak programa sira ne’ebé harii infrastrutura lokál kusta uitoan liu kompara ho governu-nia programa ne’ebé harii infrastrutura32. Projetu barak mak hatudu ona katak sira-nia kustu menus no fasil atu implementa duké governu-nia projetu sira ne’ebé ekivalente. Komunidade-nia podér atu kontrola projetu sira ne’e hanesan intensaun ida atu asegura katak rekursu sira destina duni bá komunidade-nia nesesidade, katak sasán públiku nian harii duni ho kualidade di’ak, mantein no uza ho di’ak, no risku bá korrupsaun bele menus kompara ho tipu programa seluk33. Estudu kona-bá CDD iha nasaun tolu (Filipinas, Indonézia no Burkina Faso) deskobre katak iha Indonézia-nia Projetu Dezenvolvimentu Sub-Distritu (PDS), infrastrutura ne’ebé implementa hosi komunidade kusta menus liu ho porsentu 56 duké infrastrutura sira ne’ebé harii liu hosi governu-nia kontratu34.

CDD bele ajuda harii governasaun inklusivu, no enkoraja partisipasaun no kontabilidade iha nível lokál, halo interasaun ho grupu ki’ik no mukit sira.35 Iha ona regra no métodu espesífiku sira ne’ebé ita bele uza hodi fasilita partisipasaun. Iha Indonézia, ida ne’e inklui regra sira kona-bá feto sira-nia partisipasaun iha prosesu planeamentu no implementasaun, no mekanizmu transparénsia-nia estájiu hotu-hotu, porezemplu hanesan fó-sai informasaun bá públiku iha kuadru suku nian, mekanizmu hodi atende reklamasaun, no monitorizasaun komunidade, inklui sira ne’ebé liu hosi organizasaun sosiedade sivíl. Instrumentu sira hanesan ne’e importante tebes bá vizaun ne’ebé promove inkluzaun, transparénsia, no kontabilidade iha Indonézia-nia programa CDD.36

Iha evidénsia limitadu kona-bá programa CDD-nia abilidade atu transforma komunidade-nia norma ne’ebé bele refleta mudansa di’ak iha feto no grupu ki’ik sira-nia podér halo desizaun iha projetu-nia li’ur37. Tanbá ne’e, importante tebes atu iha expetativa realístiku kona-bá kualidade hosi hakbiit komunidade nian, liuliu iha tinan inísiu PNDS nian. Austrália sei suporta esforsu sira ne’ebé sei tau-matan no asegura katak PNDS-nia objetivu esplísitu mak atu hadi’a komunidade-nia partisipasaun iha projetu.

Jerálmente, laiha evidénsia ne’ebé sufisiente atu haforsa teoria ne’ebé dehan katak, projetu ida bele kria konfiansa di’ak, rede no asaun koletivu bainhira komunidade sira uza CDD-nia aproximasaun hodi servisu hamutuk. Esperiénsia internasionál balu hatudu katak CDD bele harii kapitál polítiku bá governu sira kuandu CDD bele garante katak projetu-nia fundu to’o duni iha komunidade regulármente.38 Avaliasaun ida kona-bá Filipinas-nia programa KALAHI-CIDSS haktuir katak iha tinan hitu nia laran, projetu-nia implementasaun ne’e “aumenta duni nível konfiansa iha komunidade sira, no aumenta mós membru komunidade iha organizasaun laran. Avaliasaun ne’e hatudu katak porsentu 12.3 aumenta iha proporsaun respondente ne’ebé indika katak sira iha konfiansa bá kuaze ema hotu iha suku laran, no sira mós iha konfiansa (maske uitoan maibé pozitivu) bá ofisiál lokál no nasionál sira.”39

Maske iha projetu laran ema bele haree katak iha ona mudansa di’ak iha liña komunikasaun entre governu no sidadaun, seidauk iha evidénsia sufisiente ne’ebé dehan katak ida ne’e bele fó kontribuisaun naruk atu hametin komunidade-nia asosiasaun no governasaun lokál bainhira programa ne’e remata. Nune’e mós, presiza tan iha estudu no evidénsia hodi komprende impaktu hosi CDD-nia programa bá iha fatin sira ne’ebé sei sofre hela ka, sofre tiha ona konflitu (konflitu-laran no pós-konflitu), liuliu tanbá númeru orsamentu ne’ebé programa PNDS sei fornese bá komunidade boot tebes. Hanesan mensiona ona iha leten, CDD-nia aproximasaun mak mekanizmu ne’ebé efetivu hodi fornese orsamentu no asesu bá servisu sira iha fatin pós-konflitu ne’ebé ninia governu laiha kapasidade. Banku Mundiál-nia meta-avaliasaun deskobre evidénsia balu kona-bá kontribuisaun pozitivu hosi CDD-nia programa ne’ebé ajuda supera konflitu sira iha Filipinas no Indonézia, ajuda atende komunidade-nia reklamasaun sira, no ajuda dezenvolve komunidade-nia meius hodi rezolve konflitu sira.40 Difisil atu avalia programa-nia impaktu-tempu-naruk bá iha kapitál sosiál no governasaun tanbá laiha sasukat esplísitu ida no programa CDD-nia durasaun ne’ebé badak. Liu hosi ninia apoiu monitorizasaun no avaliasaun, Austrália bele suporta estudu bá tempu naruk atu buka hatene PNDS-nia impaktu bá iha komunidade-nia fiar no asosiasaun, no mós bá iha governasaun iha nível nasionál no sub-nasionál, no mós PNDS-nia impaktu atu hamosu, halo-aat- liu tan, ka ajuda rezolve konflitu.


Aneksu 5: PNDS nia Teoria kona-bá Mudansa


PNDS nia Teoria kona-bá MudansaFigure 1 (p. 25 iha main document; p. 15 iha annexes)

Ekipa PNDS GoTL



PNDS NIA OUTPUT

  • Konsesaun sira dezembolsa ona, komité sira komunidade nian orientadu & akompañadu, padraun social & téknika avalia ona




  • Estabelese, implementa, no minotora ona sistema operasionál GoTL nian ne’ebé apropriadu no konsistente (HRM, PFM no bankária, garantia kualidade, M&E no atendimentu bá keixa, planeamentu inter-ajénsia)

Fatór risku esternu:

  • Lideransa ka intervensaun polítika GoTL nian ne’ebé inadekuada

  • Alokasaun orsamentu GoTL nian ne’ebé inadekuada

  • Envolvimentu liña ministeriál ne’ebé inadekuadu

  • Atividade doadór nian ne’ebé la-koordenadu

  • Kapasidade absortivu GoTL nian ne’ebé inadekuadu

Komité komunidade

Fatór risku esternu:

  • Obstákulu sosiál/kulturál bá feto sira nia partisipasaun iha prosesu oioin PNDS nian

  • Kapasidade no vontade hosi líder komunitáriu no membru komunidade nian atu envolve iha planeamentu, konstrusaun, no O&M bá infraestrutura, atendementu bá keixa sira

  • Komunidade nia asesu pontuál bá materiál no rekursu sira

  • Disputa rai nian (mezmu prosesu mitigatóriu PNDS nian)


PNDS NIA REZULTADU FINÁL

Komité sira komunidade nian planea implementa no mantein infraestrutura eskala ki’ik ho partisipasaun boot hosi komunidade

Membru komunidade

Fatór risku esternu:

  • Providénsia hosi liña ministerial ne’ebé inadekuadu relasiona ho servisu sira

  • Obstákulu sosiál/kulturál bá feto sira ne’ebé benefisia hosi infraestrutura PNDS

  • Konflitu komunitáriu

PNDS NIA OBJETIVU

Membru komunidade sira hetan benefísiu sosiál no ekonómika ne’ebé aumenta

GoA nia apoiu

Apoia Ekipa PNDS GoTL fó…

  • Programa Apoiu PNDS: TA bá TWG, MAE, banku sira nst; fornese formasaun bá pesoál PNDS nian; M&E.

  • Programa G4D: Apoia ajénsia sira sentrál atu fasilita providénsia PNDS nian n.e. MoF, CSC, MAE

  • Programa Setorál: Apoia liña ministeriál sira atu envolve iha Komité Inter-Ministeriál iha nível hothotu

Apoia liña ministeriál ne’ebé envolve ho komité komunidade bá PNDS…

Programa Setorál: Apoia ofisiál sira liña ministeriál nian iha distritu, espesiálmente in WASH no estrada rural, fó apoiu tékniku bá komité komunidade sira

Apoia GoTL hasa’e atendementu servisu públiku ne’ebé boot liu…..

  • Programa Setorál: Fortalesementu atendementu servisu públiku iha liña ministeriál nian

  • G4D: Apoia ajénsia sira sentrál atu fasilita atendementu servisu públiku ne’ebé boot liu

Baixar 0.95 Mb.

Compartilhe com seus amigos:
  1   2




©bemvin.org 2020
enviar mensagem

    Página principal
Prefeitura municipal
santa catarina
Universidade federal
prefeitura municipal
pregão presencial
universidade federal
outras providências
processo seletivo
catarina prefeitura
minas gerais
secretaria municipal
CÂmara municipal
ensino fundamental
ensino médio
concurso público
catarina município
Dispõe sobre
reunião ordinária
Serviço público
câmara municipal
público federal
Processo seletivo
processo licitatório
educaçÃo universidade
seletivo simplificado
Secretaria municipal
sessão ordinária
ensino superior
Relatório técnico
Universidade estadual
Conselho municipal
técnico científico
direitos humanos
científico período
espírito santo
pregão eletrônico
Curriculum vitae
Sequência didática
Quarta feira
prefeito municipal
distrito federal
conselho municipal
língua portuguesa
nossa senhora
educaçÃo secretaria
segunda feira
Pregão presencial
recursos humanos
Terça feira
educaçÃO ciência
agricultura familiar